ठाणे : जिल्ह्यातील शहापूर तालुका एज्युकेशन सोसायटीच्या ग. वि. खाडे विद्यालय व ज्युनिअर कॉलेजच्या आंतरशालेय क्रीडा स्पर्धा नुकत्याच आयोजित करण्यात आल्या होत्या.
स्पर्धेचे उद्घाटन संस्थेच्या कार्यकारी मंडळाचे अध्यक्ष जयवंतभाऊ देशमुख यांचे हस्ते करण्यात आले. या वेळी सचिव विद्या वेखंडे, विश्वस्त मंडळाचे अध्यक्ष सदाशिव खाडे, सचिव वि. अ. शेनॉय, मुख्याध्यापक एम. एस. पवार उपस्थित होते. या स्पर्धेत पाचवी ते बारावीपर्यंतचे विद्यार्थी कबड्डी, धावणे, आदी विविध क्रीडा प्रकारांत मोठ्या संख्येने सहभागी झाले होते.
स्पर्धेनंतर लगेचच विजेत्या खेळाडूंना ट्रॉफी, मेडल व प्रमाणपत्र देऊन गौरविण्यात आले. स्पर्धेच्या यशस्वीतेसाठी माध्यमिक व उच्च माध्यमिक विभागाचे उपमुख्याध्यापक, पर्यवेक्षक, शिक्षक, क्रीडा शिक्षक व शिक्षकेतर कर्मचारी यांनी विशेष मेहनत घेतली.
